 『うちなあぐちしさびら物語小＆スピーチ』 |
|
|
２００８年６月改訂 |
|
|
註：くぬ物語ぬ日本語版や、うちなあぐち版とぅまじゅん、『うちなあぐちしさびら物語小＆スピーチ』（２００８年６月発行、南謡出版）んかい集録さっとをいびいん。またくぬ本ぬんかいや音声ＣＤぬ付録とぅさあい付ちょをいびいん。 |
|
 |
|
|
花子物語 （すてぃみてぃ） お婆:ええ、花子、早く起きれえ。 花子:なあ、何時なとをいびいが、お婆。 お婆:きっさ、七時なとをしが。今日ん仕事やさに。（花子や胴、起くさびたん。） 花子:何がやらあ、頭ぬ病むっさあ。けえ憩いがやあ。 お婆:あっさ、又ん ふゆうまあすんちなあ、ひゃあ。 花子:あんせえ、あんまさいびいとおてぃ。うんなばあどぅ、憩らりやびいしえ。まるけえてえ、仕事え憩らんでえ、うたてぃ、ふしがりやびらん。 お婆:汝や、ちゃあ、憩いぬ考えびけえんし、うぬ内なかい、首ないねえ、ちゃあすが。とお、早く起きらにっさ。 花子:首ならわん、済まびいさ。安手間小どぅやとをてぃ。 お婆:何、ごうぐちはあぐちしいくゎてぃ。口かねえらあ、会社ぬ上ぬ人んかいしえ。何やらわん、早くどう。 あんまあ（チルー）:お婆、すてぃみてぃなありい、何が、あんし、あびやあ、あびやあしんそうち。すてぃみてぃい、すがてえくとぅ、早くみそうれえ。花子や、なあだ、起きらんどぅあがやあ。 お婆:今、来ゅうさ。花子や、今起きてぃ直やくとぅ、面あ、洗あらちから、むぬお、食ましえ。会社あ辞みいんでぃぬやくとぅ、なあ、行かんてぃん済むんでぃ。ひひひ。 あんまあ:あぎじぇ、何、会社辞みんでぃなあ。違てえ居らに。うぬ花子や。 花子:あっせ、お婆よ。辞みてぃん済むんでぃる言ちょをいびいる、辞みいんでえ言ちぇえねえやびらんせえ。 お婆:いぇえ、あんやたみ。だあなあ、お婆や耳ぬそうん無えんなてぃが居らあ。チルー、花子や考え直ち、仕事んかい行ちゅんでぃさ。 あんまあ:うりがむぬお、何がくぃいやらあ、むさっとぅ分からん。またん、くさむにいどぅやいやさびらに。うりえ済むしがよう、お婆達よ、すてぃみてぃいや、なあ、自なあくる、みそうりよう。 お婆:あいええ、何が。 あんまあ:急じ、水曜市んかい、買ういむんしいが行かんでえないびらん。にっかないねえ、値安物ぬいきらくなたい、買おい外じゃきたいしいねえ、じゃあへえやいびいせえ。 お婆:今日や水曜日やたみ。あんせえ、気掛きれえ、とお。 あんまあ:あんせえ、行かい。花子や、目や強とをがやあ。 お婆:花子心配あ、さんてぃん済むん。 花子:お婆、我歯ブラシぬ無えらんなとをしが、うんじゅお、使いみそうらんたんなあ。 お婆:はっしゃ、何が、お婆が汝歯ブラシ使いんちんあみ。無えらんあれえ、我歯ブラシ使れえ。 花子:あっさ、人ぬ歯ブラシぬん、使ありんなあ、はごうさぬ。なあ、くぬ前、買うてぃ置ちぇえたる新歯ブラシ、使やびいさ。 お婆:我ねえ、すてぃみてぃいや、先なとをちゅんどお。汝、待っちいねえ、明日けえ成いん。 花子:うう、先、みそうれえ。やしが、あんまあや、朝っぱらから、慌てぃはあていし、まあかい、もうちゃが。 お婆:水曜市んかいんでぃ。車歩かっち、ちゃあぶうるない、去いたん。 花子:値安、買うゆんち、うみはとをるばす、やみせえさやあ。 お婆:チルーや、でえじな、くめえきやあやくとぅ、やあ。 花子:うりえ、済まびいしが、我弁当やしこうてぃ呉んそうちゃがやあ。 お婆:あい、弁当ぬわきえ、無えんしが。一大事な事。 花子:又ん忘りとをみせえさやあ。あんまあや、人ぬやな口びけえん言みしえしが、自や、ゆく、ちじどぅ、やみせえる。 お婆:ええ、親ぬやな口え言らんどう。だあ、お婆がしこうてぃ取らさ。実にやれえ、汝ん、なあ大人なとをくとぅ、自ぬ弁当ぬあたいや自し、しこうらんでえならんどう。 花子:うう、分かとをいびいさ。今日や、なあ、にっか成とをいびいくとぅ、弁当やコンビニんじ、買やびいさ。お婆や、我事お、かまあんようい、自ぬ事、しんそうれえ。 お婆:あいゆか、姦さっとをるむん。 花子:お婆、我がすてぃみてぃ食どをちゅる間、我衣、アイロンかきてぃみそうらんな。 お婆:お婆や、自ぬ事そをん。 花子:ようい、一時小どぅやいびいるむんぬ。アイロンかきいるうっぴぬまどぅん無えやびらんどぅ、あみせえんなあたい。 お婆:何やんくぃいやんさがちいん、むる、お婆びけんたるがぎてぃ、くぬ孫あ。だあ、持っち来わ。さあらない、当てぃら。 花子:果報しやいびいん、お婆。 セールスマン:はいさい、来ゃあびらさい。 お婆:あいなあ、何が、うんじゅお、誰やみしえが。 セールスマン:アイロン売やあでえびる。今、外うとおてぃアイロンぬ話ぬ聞かりやびたくとぅ、アイロンぬ入用やいがすらあんでぃ思やびてぃ、ぬばがとをるばす、やいびいん、さい。 お婆:誰んアイロン買いんでえ、言ちぇえ居いびらん。入用無えやびらんくとぅ、早く、他所んかい、いめんせえびり。 セールスマン:あんしえ、御無礼さびたん。 花子:お婆、誰が、めんそうちょをいびいが。 お婆:ゆうちらん無えん。物売やあどぅやる。 花子:うぬ早くから、物売やあんでえ、ひるましむん。 お婆:汝がる、ひるまさる。うぬにっか成とおるむんぬ、今ちきてぃ、しこういむこいん、成てえ居なら、そう抜ぎてぃ慌てぃれえ。ゆんたくひんたくする暇あ無えらんどをやあ。 花子:なあだ、時間のお、まんどをいびいん。髪え運転さがちい、さばち、面あ、信号待ちぬばすんじん、作らりいん。タイムカードお、押すてぃから、駐車場んかい車置ちいが行けえ済まびいん。 花子:汝ぐとおりい、さっこう、会社うせえとをるむん。あんそをる肝なかいや、世ぬ中あ、渡ららんどをやあ、花子。誰ん習あさんくとぅ、我が習あすしが、汝ぐとをる若女お、やあ、会社うとおてえ、一番うっとぅうやる筈やい、人先、会社んかい行じ、掃除かちん出来らち、台所んじ、湯んふかち待っちょをきわるやんどう。すてぃみてえ、茶とぅかコーヒーとぅか、うさがいる男んちゃあん、めんせえる筈やるむぬ。女お、あんしすしがる実にやる。 花子:あっせ、お婆よ。今あ、なあ世や、あい変わとをいびいんどうやあ。今ぬ世やや、男女平等んでぃ言ち、男んちん、女んちん無えやびらん。諸、いぬ事さんでえ成いびらん。 お婆:あいえやあ、ふんぬう。あんしいねえ、男ん、子産さんでえならんばあなあ。男あ、乳ぶっくゎん無えらなそうてぃ、如何し、赤子んかい乳飲ますが。とお、男女平等んでぃ言ぬむんやれえやあ、今日や、汝や、男すがいし行きわ。 花子:なあ、お婆とぅ話しいねえ、にっかけえ成いくとぅ、行ちゃびらい。あい、我車ぬ鍵え、まあんかい置ちぇえたやがやあ。お婆や、分かいみそうらんなあ。 お婆:あぎじゃびよ、みしなあくみしなあく。 （ミシナアク株式会社うとをてぃ。） 上司（大城）:あい、花子さん。ひるましむん。今日や気掛ちがきてぃ湯んふかち取らち。 花子:何が、いっそうまとぅ何ん変わやびらんどう。湯や我があ、沸かちぇえ居いびらん、ガスぬ火がる沸かちぇえいびいる。我ねえ、火点きたい、消ゃあちゃいさるうっぴでえびる。 上司:とお、湯ん、ふかちぇえるむん、コーヒー小ん、作てぃ入りてぃ呉らんがやあ。 花子:湯沸かちん、なあんあいびらん、コーヒーまでぃ、入りてぃ呉ぃりんでえ、どぅくやいびいっさあ。コーヒー小入りいるあたいや、自し成いびらに。だあ、我ねえ、業かちみてぃ、忙なさいびいるむんぬ。 上司:何が、汝があ、作らんてぃん済むん、沸ふかさあんかい水、入りてぃ、濾し紙んかいコーヒー粉、入りやあい、スイッチ入りいねえ、後お、電気ぬ、なんくる、作てぃ取らすしえ。 花子:やくとぅ、何やあくぃいやあ、自し、しんそうれえ。我ねえ、事務さあでえびる、じょうしちゃあや、あいびらん。 上司:あっさ、花子ん、強ばあ成とをっさあ。去年、新入社員やたるばすお、そうん入っち、何ん『うう』どぅやたしが。 花子:社員とぅし、そうらあしく成とをるばあどぅ、やいびいる。 上司:やさやさ、社員がむる一人なあ一人なあ、そうらあしく成てぃいちいねえ、社長ん肝ふじみそうち、嬉っさしみせえる筈どう。うりえ、済むしがよう、来ゅうる日曜日え、暇あ無えらに、花子。あらんよう、まるけえてえ、まじゅん、コーヒー小やてぃん、飲まな、んでぃ思てぃよう。 花子:あいな、来ゅうる日曜日え清明、うさぎいが行かんでえないびらなそをてぃ。何がコーヒーやれえ、毎日飲どをいびいくとぅ、必じ、まじゅん、飲まんてぃん済まびいるする。 上司:あねえええ、あらん。 花子:あいうり、社長が、めんそうちょをいびいしが。 （上司え、急じ、社長方んかい、挨拶しいが向かやびたん。後から花子ん、コーヒー、御膳んかい乗してぃ、行ちゃびたん。） 花子:社長、コーヒーうさがみそうれえ。 社長:果報しやあ、花子さん。 （花子や社長ぬ御座から出やびたん。） 社長:花子や、実に、そう入っちょをっさあ、やあ、大城君。 上司:近頃ぬ若小や、清明暈ぬ節柄ぬ故がやらあ、くさぶっきてぃる歩っちょをいびいるさい。 南謡出版ホームページ「うちなあぐち賛歌」から
|
|