日本国憲法（抜粋）　　　

　日本国民や、まっとおうばに選挙さっとおる国会うとおてぃぬ代表者、通（とぅう）ち行動し、我達（わったあ）とぅ我達ぬ子孫（くゎんまが）ぬたみなかい、総国民とぅぬ協和なかいぬ成果とぅ、我達国全土んかいわたてぃ自由ぬむたらする恵幸、確保さあに、政府ぬ行為なかい又ん戦（いくさ）ぬ惨禍ぬ起（う）きゆるくとぅぬ無（ね）えらんねえしするくとぅ胆（ちむ）ちわみてぃ、くまんかい、主権ぬ国民んかい在るくとぅ、うんぬきてぃ、くぬ憲法、定みゆん。むとぅから国ぬ政治や、国民ぬ厳粛やる信託さあになとおるむんどぅやる、うぬ権威や国民んかい由来（ゆれえ）し、うぬ権力お国民ぬ代表者ぬ行使さあに、うぬ福利え国民ぬ享受すん。くりえ人類普遍ぬ原理どぅやる、くぬ憲法やあんそおる原理んかい基ぢゅるむぬやん。我達や、うりんかい反する憲法、法令うりから詔勅お諸、外（は）んちゅん。
　日本国民や、十百年（とぅむむとぅし）ぬ平和、願（にが）てぃ、人間（にんじん）互え（たげ）ぬ関係、かげえゆる崇高やる理想、深く自覚するむんどぅやる、平和、敬ゆる諸国民ぬ公正とぅ信義、信頼さあに、我達安全とぅ生存、保（たむ）ち行かんでぃ胆ちわみたん。我達や、平和、保ち、専制とぅ隷従、厭迫とぅ偏狭、地上から十百年、取（とぅ）い退（ぬ）きらんでぃ、はまとおる国際社会うとおてぃ、光（ふぃかり）ある分んかい就かんでぃ思（うみ）ゆん。我達や、全世界ぬ国民ぬ、いぬぐとぅ恐怖とぅ欠乏から逃りてぃ、平和ぬうちなかい生ちち行ちゅる権利、持っちょおるくとぅ確認すん。
　我達や、まあぬ国家ん、自（どぅう）ぬ国ぬくとぅびけえんし、ゆすぬ国、見（ん）だん事ぬあてえならんどぅある、政治道徳ぬ法則お普遍的なむぬんやい、くぬ法則んかい従ゆるくとぅお、自ぬ国ぬ主権、維持さあに、ゆすぬ国とぅ対等関係んかい立たんでぃする各国ぬ債務どぅやるんでぃ信じゆん。
　日本国民や国家ぬ光んかいかきてぃ、全力あぎてぃ、くぬ崇高やる理想とぅ思道、達成するくとぅ誓ゆん。
（略）

第二章　戦争ぬ放棄
第九条【戦争ぬ放棄、軍備とぅ交戦権ぬ否認】(1)日本国民や義とぅ秩序、基とぅする国際平和、真胆（まじむ）に望でぃ、国権なかいする戦とぅ、武力なかいぬ威嚇、又、武力ぬ使ゆしえ、国際紛争、はんしゅる手段とぅしえ、十百年、ちゃん投ぎゆん。
(2)前項ぬ目的、叶ゆるたみ、陸海空軍うぬ他ぬ戦力お持ったん。国ぬ交戦権や認みらん。

第三章　国民ぬ権利とぅ義務
第一〇条【国民ぬ要件】日本国民やる要件や、法律なかいくり、定みゆん。
第十一条【基本的人権ぬ享有】国民や、諸ぬ基本的人権ぬ享有、妨ぎららん。くぬ憲法が国民んかい保障する基本的人権や侵するくとぅぬならん十百年ぬ権利とぅさあに、今とぅ後々ぬ国民んかい与いらりゆん。
（略）

第一三条【個人ぬ尊重とぅ公共ぬ福祉】諸ぬ国民や、人とぅさあい、尊ありゆん。命（ぬち）、自由うりから幸福追及するくとぅんかい対（てえ）する国民ぬ権利にちいてぃえ、公共ぬ福祉んかい反さん限（かじ）り、立法うぬ他ぬ国政するばすに、最大ぬ尊重、入要（いりゆう）とぅすん。
（略）

第二四条【家族生活うとおてぃぬ個人ぬ尊厳とぅ両性ぬ平等】
　にいびちえ、両性ぬ合点びけえなかい基ぢち成てぃ、夫婦ぬいぬ権利、持っちょおるくとぅ、基とぅし、互えぬ胆揃（ちむずり）いなかい、むとぅうちいかんでえならん。
（略）

第三四条【抑留・拘禁ぬ要件、不法拘禁んかい対する保障】　誰（たあ）やてぃん、ちゃあき理由（わき）、言やってぃ、あんし、ちゃあき弁護さあんかい頼むる権利、呉ぃららんでえ、かちみらったい又込（く）みらったいしえならん。又、誰やてぃん、まっとおばな訳理ぬ無えらんでえ、拘禁やさらな、望みぬあれえ、うぬ訳え、ちゃあきうぬ人とぅ、うぬ弁護さあが出じゆる公開ぬ法廷うとおてぃ見しらんでえならん。
（略）

第六七条【内閣総理大臣ぬ指名、衆議院ぬ優越】（１）内閣総理大臣や、国会議員ぬ中から国会ぬちわみ事さあに、指名すん。くぬ指名や、他ぬ諸ぬ案件やか先（さち）に、さんでえならん。
（以下略）　

註：いいくる日本語とお、いぬむん漢語多く使てぃ、なあ、うちなあぐちあらんさにんでぃ、言みせえる人ん達んまんどおる筈やいびいん。
　やしが、くぬホームページぬ「うちなあぐち語彙論」んかいある通い、和語びけんなかいや、憲法んでえや書からんしとういぬむん、漢語使らんでえ、うちなあぐちびけんなかいや、書ちぐるさるむんやいびいん。かわてぃ、社会科学用語お、日本語やてぃん、江戸末から大正時代にかきてぃ、外国語翻訳するたみに、造語しちゃるむんどぅ、やいびいる。あんし又、漢語ぬ本場中国んじん、和製漢語うぬまま、使とおしえ、大概ぬ人が分かとおる通いやいびいん。言語が社会んかいあたゆんねえし、語彙わあちゃい、外来語（漢語ん合あち）使たいすし、言語ぬ本能どぅやいびいる。くぬ言語ぬ本能ぬ望みぬかなあららん言語お、生ちむしとお、いぬむん、死ぬしか無えやびらん。
　日本語お、漢語使ゆる事にゆてぃ、和語、ちゃあ生かしいそおるばすどぅやいびいる。
　うちなあぐちん、うぬあたいやならんでえ、如何さびいが。
　何が、組踊ん又明治時代ぬ「沖縄対語」（日本語教科書）んかい有ぬ沖縄語んじやてぃん、いちゃさきいぬ漢語ぬ使あらっとおいびいしえ。本能んかい従てぃ。