比嘉 清:作   トップページへ戻る
平成25月14


   (ちち)(うく)(むん)

 (んかし)きかし、御神(うかみ)加那志(がなしい)(たあ)が、(ちゅ)とぅさあに、地上(じち)んかい()りてぃめんそおちゃる時分ぬ話どぅやいびいる。

ある(ふぃい)、地上んかい降りてぃ(ちゃあき)(ゐきが)ぬ神とぅ(ゐなぐ)ぬ神とぅが根引(にいびち)祝儀(すうじ)すぬ(くとぅ)んかいなやびたん。

 御神加那志達にとぅてぃ、地上(をぅ)てぃぬ根引ち祝儀え、(はじ)みてぃぬ事やいびいたん。(てぃん)ぬあまくまから御神加那志達や、なあ銘々(めえめえ)(みい)婿(むうく)新嫁(みいゆみ)んかいぬ(うく)(むん)()っちめんそうちゃん。いいくる、男神え男物(ゐきがむん)、女神え女物(ゐなぐむん)、ふぃさぎてぃめんそうちょおいびいたん。

 うぬうちなかい、祝儀(すうじ)(はめ)まやびたん。うにいや三味線(さんしん)や、なあだ()えやびらんたくとぅ、祝儀座(しゅうじざあ)んでぃ()ちん、(うし)太鼓(でえく)叩ちゅる(うとぅ)んかい合あち、歌たい()うたいするうっぴどぅやいびいたる。

 さてぃ、(ちち)んかいめんせえたる男神え、(どぅう)地上(じち)から一っちん、近さくとぅんでぃち、悠々(ゆうゆう)とぅそおみせえたん。やいびいしが、地上(じち)(なが)みたれえ、根引(にいびち)ち祝儀え、きっさ、けえ始まとおいびいたん。()りめんそおちょおる御神(うかみ)加那志(がなしい)(たあ)酒飲(さきぬ)でぃ、(をぅどぅ)()にそおいぎさいびいたん。

(ちち)ぬ神え、「とおなあ、くりえ違がたるむん」でぃ、慌てぃやに、すがゆしん、ようい一時(いとぅちゃ)、矢やかん(ふぇえ)く、(とぅ)てぃ()ちゃびたしが、(たあ)やかん、にっかけえなとおいびいたん。月ぬ神え、(すば)ひらぬ御神加那志達んかい、だんじゃあむんじゃあしいがちいなあ、まじゅん、()うやびたん。

 さてぃ、根引(にいびち)ちぬ仲立ち神が、新婿(みいむうく)新嫁(むうゆみ)手引(てぃいふぃ)ちゃあに、(をぅどぅ)いぬ中心(なかじ)ぬんかい、()うてぃ、めんそおちゃん。

あんし、うぬ仲立(なかだ)ち神え、(ぬう)がやら、()び叫びやあみそうちから、小箱(くうばく)御差上(うしゃ)ぎみそおちゃん。うぬ拍子(ひょうし)なかい、御神加那志達や、ちがあるうさあに、新婿(みいむうく)新嫁(むうゆみ)んかい、なあ銘々(めえめえ)(うく)(むん)御差上(うしゃ)ぎみそおちゃん。

 「とおなあ、違とおるむん」。一っちん、人後(ちゅあとぅ)からめんそうちゃる(ちち)男神(ゐきががみ)え、(どぅう)(うく)(むん)(てぃい)ちんちょうん、()っちぇえ(をぅ)らな、()(どぅう)やる(くとぅ)ぬ分かやびたん。

やいびいしが、(なま)でぃいから、()やでぃん、如何(ちゃあ)ん成ゆるむぬおあいびらん。するうち、(うく)(むん)御差上(うしゃ)ぎゆしん、(うり)が番とぅないびたん。

 (どぅう)住処(しめえず)やる(ちち)、うちゃがてぃ()いどぅんしえ、丁度(ちょうどぅ)十五夜(じゅうぐや)ぬ月ぬ、ぬしかとおいびいたん。月え、白光(しるびちゃ)いし、地上(じち)ゆ明かがらちょおいびいたん。月ぬ神え、(ぬう)がやら、いちゃんだん、(なだ)()とぅさびたん。

「あっさ、地上(じち)から()じゅる月え、あん(ちゅ)らさあたみ。やさ、(どぅう)自慢(じまん)なゆしえ、自ぬ月くうとお()えらん」

月ぬ男神え、ちゅうちゃん、いそうさなやに、「やさ」んでぃち、()びみそおちゃん。

 あんし、今度(くんど)お、(われ)(ふく)いみそうち、手叩(てぃいたた)ちから、新郎(みいむうく)新婦(みいゆみ)(めえ)んかい、()やびらん。

(わん)ねえ、(じゅん)にやれえ、新郎んかいや男物(ゐきがむん)御差上(うしゃ)ぎやびらんでえ、ないびらんむんやいやさびいしが、新郎や今日(ちゅう)や、新嫁()いみそおちょおいびいん。新郎に(とぅ)てぃ、うりやかぬ宝物(たからむん)()えやびらん。やいびいくとぅ、(わん)ねえ、(ちゅ)()や、新嫁びけんかい、あぬ(てぃ)ぬんかい、あん(ちゅ)らさ(てぃ)い渡とおる(ちち)ゆ御差上ぎやびいん」

 月ぬ神ぬ(いいび)え、天ぬんかい浮かどおる月ゆ()ちょおいびいたん。新郎とぅ新婦や、()(とぅちゃ)(ぐぁあ)や、とぅぬうまぬうそおる風儀(ふうじ)やいびいたん。

 やいびいしが、新婿(みいむうく)新嫁(むうゆみ)が、うちゃがてぃ、(てぃん)ぬ月ゆ(なが)みたれえ、(ちゃあ)き、御二所(うたとぅくる)お、(われ)(がう)んかいなやびたん。

「あいなあ、あん(ちゅ)らさ、()がとおいびいる。まあにん()えらん土産物(なあぎむん)やいびいんたい。どうでぃん、我物(わあむん)とぅしち、うたびみせえびり」

若さる新婿(みいむうく)新嫁(みいゆみ)地上(じち)(をぅ)とおてぃ、(ちゅ)(はじ)まいとぅ成みそおちゃん。

 うぬ(ふぃい)(あとぅ)からどぅ、大人(うふっちゅ)(ゐなぐ)んかいや(ちち)(むん)ぬ、あんねえし成たんでぃぬ(くとぅ)やいびいん。 

                                                      終